Chi sonse pa
Chela de Bulsan é steda la cuarta stazion metuda a jì dal EIAR (Ente Italiano per le Audizioni Radiofoniche) tla Talia do da Roma, Milan y Napoli. Ala à scomencé sia ativité ai 12 de messel dl 1928 con na programazion de cinch ores al di che prevedova notiziars y programs musicai metus adum en pert da la orchestra stabila locala dl EIAR.
Ai 8 de setember dl 1943 é la Senta vegnuda touta ite da les forzes militares todesces y colieda a les emitentes dl Reich.
Do dai 25 de auril dl 1945 él endò jù en ona les trasmiscions per talian a cura de Radioitalia. Tres en chel ann, de setember, àl scomencé i notiziars per todesch. Ai 4 de auril dl 1946 él jù en ona la pruma trasmiscion per ladin, ma an à abù da aspeté enchin al 1955 per avei na programazion regolara per almanco sies dis a l’edema.
Ai 12 de otober dl 196 se à la RAI tramudé tla senta nueva y atuala de Plaza Mazzini. Tres en chel di él jù en funzion ence la cuarta rei radiofonica locala (RAI-MF4) che permet de scuté i programs locai per todesch y per ladin zenza messei sospene la programazion dles reies nazionales.
Ai 7 de fauré dl 1966 àl metù man les trasmiscions televisives per todesch con l telegiornal Tagesschau y d’autri programs culturai y de orela curta. Dl 1975 à la lege nr 103 istituzionalisé les trasmiscions radiofoniches y televisives ti lingac todesch y ladin che vegn regolamentedes da na convenzion sotescrita da la aministrazion dl Stat y da la RAI.
Dl 1979, canche al é jù en forza la terza rei, àl metù man la trasmiscion dl telegiornal regional dl Trentin-Südtirol metù a jì en colaborazion anter les redazions de Bulsan y de Trent.
Ai 12 de messel dl 1988 àl scomencé les trasmiscions televisives per ladin con doi apuntamenc edemanai de 10 menuc vigniun y na trasmiscion de 30 menuc vigni terza edema. Ai 22 de dezember él vegnù metù a jì i prums implanc dla enscì dita RAITRE/BIS (sciche dì na cuarta rei locala) che permet de udei paralelamenter i programs locai todesch y ladin y chi dla terza rei nazionala.
Dl 1998 é la programazion televisiva per ladin deventeda da vignidì con l mete a jì l telegiornal TRAIL, pert de na fascia informativa televisiva emportanta te trei lingac: da les 19.30 per talian, da les 19.55 per ladin y da les 20.00 per todesch.
Dl 1999 él pié via la seconda edizion dla Tagesschau (”10 nach 10”) y la programazion televisiva per todesch é chersciuda da 550 a 750 ores endut al ann.